भैरहवा । लुम्बिनीको पडरियामा जारी इण्डो –नेपाल क्रिकेट प्रतियोगितामा आईतबार भएको खेलमा सईद ११ ले सन्तकबीर नगरलाई १४ रनले पराजित गरेको छ ।
टस हारेर ब्याटिङको निम्तो पाएको सईद ११ ले निर्धारित १५ ओभर मध्ये १० दशमलव २ ओभर खेल्दै सबै विकेटको नोक्सानीमा ६६ रन बनाएको थियो । उसका लागि अख्तरले १२ बलमा २३ रन बनाए । यस्तै हफिजले १२ रन बनाउनु बाहेक अन्य ब्याटरले दोहोरो अंक समेत जोड्न सकेनन् ।
बलिङमा सन्तकबीर नगरका पोलार्डले ३ विकेट, सुनिल यादव, सुधिर यादव र अप्पुले समान २÷२ विकेट लिए ।
६७ रनको झिनो लक्ष्य सहित मैदान छिरेको सन्तकबीर नगर १३ दशमलव ३ ओभरमा सबै विकेट गुमाउदै ५२ रन मात्र बनाउन सक्यो । उसका लागि सुनिल यादवले सर्वाधिक ३३ रन र नरेन्द्र यादवले १० रन बाहेक अन्यले दोहोरो अंक समेत जोडन् सकेनन् ।
सईद ११ का बलर ईक्रमले ३ ओभरमा १० रन खर्चिएर ४ विकेट लिए । यस्तै मजिद र अख्तरले समान २÷२ विकेट बाडे ।
टेनिस बलले नकआउट आधारमा खेलाइने यो प्रतियोगिता यस क्षेत्रकै लोकप्रिय प्रतियोगिता मध्ये पर्दछ । पहिलो पुरस्कार २ लाख रुपैया तथा दोश्रो पुरस्कार १ लाख रुपैया रहेको छ ।
