मर्चवार । रुपन्देहीको सम्मरीमाई गाउँपालिकामा कार्यरत सम्पूर्ण कर्मचारीले आफ्नो दुई दिनको तलब बाढीपहिरो पीडितको राहतका लागि सहयोग गर्ने निर्णय गरेका छन्। बिहीबार बसेको गाउँपालिकाका कर्मचारीहरूको संयुक्त बैठकले विपद्मा परेका नागरिकलाई राहत पुर्याउने उद्देश्यले उक्त निर्णय गरेको हो।
देशका विभिन्न जिल्लामा आएको बाढी तथा पहिरोका कारण ठूलो जनधनको क्षति भएपछि पीडित परिवारको राहतमा सहयोग पुगोस् भन्ने उद्देश्यले दुई दिनको तलब उपलब्ध गराउने निर्णय गरिएको सम्मरीमाई गाउँपालिकाका इन्जिनियर रामदेव गुप्ताले जानकारी दिनुभयो। मानवीय सहयोगको भावना अभिवृद्धि गर्न र विपद्मा परेकाहरूलाई राहत पुर्याउन कर्मचारीहरूबाट संकलित रकम सरकारको एकद्वार प्रणालीमार्फत सम्बन्धित पीडितसम्म पारदर्शी रूपमा पुर्याइने उहाँले बताउनुभयो।
