मर्चवार । रूपन्देहीको मर्चवारलाई सदरमुकाम भैरहवासँग जोड्ने मुख्य सडक जीर्ण र हिलाम्मे हुँदा हजारौं स्थानीयको दैनिक जीवन कष्टकर र जोखिमपूर्ण बनेको छ। सिँचाइको पानीले खेतमा खुसी ल्याए पनि सडकमा जम्ने पानी र हिलोले विद्यार्थी, कर्मचारी र व्यवसायीलाई सास्ती दिएको छ।
केही वर्षअघि कालोपत्रे गरिएको सडक अहिले खाल्डाखुल्डीमा परिणत हुँदा सामान्य वर्षामा समेत पोखरी जस्तै देखिन्छ। सडकको दुरावस्थाका कारण सवारी दुर्घटना बढेका छन् । प्रहरीको तथ्यांकअनुसार, गत आर्थिक वर्षमा मात्रै यस सडकखण्डमा भएका ८५ दुर्घटनामा चार जनाले ज्यान गुमाएका छन् ।
स्थानीय बासिन्दाले सडक मर्मतमा स्थानीय, प्रदेश र संघीय सरकारबीच समन्वय नभएको र एकअर्कालाई दोष देखाएर पन्छिने गरेको गुनासो गरेका छन् । चुनावमा सडक बनाउने वाचा गर्ने नेताहरूले जितेपछि बेवास्ता गरेको भन्दै स्थानीयले आक्रोश व्यक्त गरेका छन्। साथै, प्रदेश सरकारले चार वर्षअघि सुरु गरेको बेथरी-मर्चवार चार-लेन सडक योजना पनि बजेट अभावमा अलपत्र परेको छ। आधारभूत पूर्वाधारबाट वञ्चित मर्चवारवासीको एउटै गुनासो छ- "देशमा व्यवस्था फेरियो, तर मर्चवारको मुहार फेरिएन।"
