गणपूरक संख्या नपुगेपछि फतुवा विजयपुरको नगरसभा स्थगित

रौतहट । रौतहटको फतुवा विजयपुर नगरपालिकामा जनप्रतिनिधिहरू बीचको विवाद र आवश्यक गणपूरक संख्या नपुगेपछि शनिबार साँझ डाकिएको नगरसभा बैठक स्थगित भएको छ। विजयपुर माध्यमिक विद्यालयमा साँझ करिब साढे ५ बजे बोलाइएको बैठकमा ६० सदस्यीय नगरसभामध्ये करिब २५ जना मात्र उपस्थित भएपछि बैठक अघि बढ्न नसकेको हो। कार्यवाहक नगर प्रमुख अम्बेया खातुन पक्षले गणपूरक संख्या (३०-३१ जना) नपुगेकाले सभा स्थगित गर्नुपरेको जनाएको छ।

अर्कोतर्फ, निलम्बित नगर प्रमुख गोपाल राय यादव पक्षका ३२ जना जनप्रतिनिधिले भने नगरपालिकाको काम कारबाही पारदर्शी नभएको र अनियमितता भएको आरोप लगाउँदै बैठक बहिष्कार गरेका छन्। वातावरण सहज र पारदर्शी नभएसम्म नगरसभामा सहभागी नहुने उनीहरूको भनाइ छ।अघिल्लो वर्ष पनि बजेट र नीति तथा कार्यक्रम प्रभावित भएको यस नगरपालिकामा जनप्रतिनिधि बीचको दूरी कायम रहँदा आगामी विकास निर्माणका काम फेरि रोकिने जोखिम बढेको छ।