नवलपरासी । नवलपरासीको पाल्हीनन्दन गाउँपालिका कार्यालयले विपन्न परिवारहरुलाई कम्बल वितरण गरेको छ । गाउँपालिकाले नेपाल रेडक्रस सोसाईटी जिल्ला शाखाको समन्वय, यूनिसेफ नेपाल लुम्बिनी प्रदेशको सहयोगमा पालिकाकाे ६ सय अति विपन्न परिवारलाई कम्बल वितरण गरेको हो ।
शीतलहरले अति विपन्न परिवारलाई असहज भइरहेको अवस्थामा कम्बल वितरण गरेपछि उनीहरुले राहत महसुस गरेको गाउँपालिका उपाध्यक्ष फातिमा खातुन अन्सारीले जानकारी दिइन् । नागरिकलाई जोगाउन प्रत्येक वडामा एक सय जनाको दरले छ वटा वडा ६ सय परिवारलाई कम्बल वितरण गरिएको उनले बताइन् ।
कम्बल वितरण कार्यक्रममा प्रमुख प्रशासकीय अधिकृत बुद्धप्रकाश पौडेल, नेपाल रेडक्रस सोसाईटी जिल्ला शाखाका सभापति राजेन्द्रप्रसाद अग्रहरी लगायतको उपस्थिति रहेको थियो ।
