अर्घाखाँची । नेपाल प्रिमियर लिग (एनपीएल) को दोस्रो संस्करणको उपाधि विजेता टोली लुम्बिनी लायन्स ‘च्याम्पियन्स ट्रफी सेलिब्रेसन टुर’ को क्रममा अर्घाखाँचीको सन्धिखर्क आइपुगेको छ । कपिलवस्तु हुँदै सन्धिखर्क आएको च्याम्पियन्स ट्रफी र टोलीलाई देख्दा स्थानीय खेलप्रेमीहरू उत्साहित भएका थिए ।
टोलीलाई स्वागत गर्दै सन्धिखर्क नगरपालिकाका नगरप्रमुख कृष्ण प्रसाद श्रेष्ठले खेलाडीहरूले राष्ट्रको नाम अन्तर्राष्ट्रिय स्तरमा चिनाएको भन्दै प्रशंसा गर्नुभयो । उहाँले नगरपालिका खेल क्षेत्रको विकासमा लाग्न सदैव तयार रहेको बताउनुभयो । यस्तै, जिल्ला क्रिकेट संघका अध्यक्ष रिषिकेश भट्टराईले पहाडी जिल्लाहरूमा क्रिकेटको महत्व बढ्दै गएकोले राज्यले उचित लगानी गर्नुपर्नेमा जोड दिनुभयो ।
कार्यक्रममा नगरप्रमुख श्रेष्ठ, वडाध्यक्षहरू, उद्योग वाणिज्य संघका अध्यक्ष तथा समाजसेवीहरूले खेलाडीको टोलीलाई सम्मान गरेका थिए । यो ‘सेलिब्रेसन टुर’ अन्तर्गत पुस १३ गते गुल्मीको तम्घासमा ट्रफी प्रदर्शन गरिनेछ । लुम्बिनी लायन्सले फाइनलमा सुदूरपश्चिम रोयल्सलाई ६ विकेटले पराजित गर्दै उपाधि जितेको थियो ।
