नवलपरासी । पश्चिम नवलपरासीको सरावल गाउँपालिकाले गत आर्थिक वर्ष २०८१/०८२ को वार्षिक प्रगति समीक्षा गर्दै समग्रमा ८४.९४ प्रतिशत वित्तीय प्रगति हासिल गरेको जनाएको छ । जिल्लाका अन्य स्थानीय तहहरूले आर्थिक वर्ष सकिएपछि समीक्षा गर्ने अभ्यासलाई खासै प्राथमिकता नदिएको बेला सरावलले सरोकारवालाहरूलाई भेला गराई आफ्नो कामको पारदर्शिता देखाएको हो ।
गाउँपालिकाका प्रमुख प्रशासकीय अधिकृत विशाल मिश्राका अनुसार, गत वर्ष चालुतर्फ ८९.५ प्रतिशत र पुँजीगततर्फ ७६.४१ प्रतिशत खर्च भएको छ । कुल ५५ करोड ४० लाख बजेटमध्ये ४८ करोड ३९ लाखभन्दा बढी खर्च गर्न पालिका सफल भएको हो, जुन अघिल्लो वर्षभन्दा ३ प्रतिशतले बढी हो । विकास निर्माणतर्फ भने ९३ प्रतिशत भौतिक प्रगति भएको छ ।
त्यस्तै, आन्तरिक राजश्व संकलनतर्फ पनि पालिका लक्ष्यको नजिक पुगेको छ । १ करोड ३८ लाखको लक्ष्यमा ९०.६ प्रतिशत अर्थात् १ करोड २४ लाख २८ हजार रुपैयाँ संकलन भएको छ । गाउँपालिका अध्यक्ष सुखाडी प्रसाद चौधरीले बजेटको अधिकतम सदुपयोग गर्दै योजना कार्यान्वयनमा जोड दिएको र हरेक वर्ष प्रगति बढ्दै जानु सुखद रहेको बताउनुभयो ।
समीक्षामा सहभागी सरोकारवालाहरूले पालिकाको कामलाई सकारात्मक भन्दै योजनाहरूको गुणस्तरीयतामा ध्यान दिन सुझाव दिएका थिए । यस्तो समीक्षाले जनप्रतिनिधि र कर्मचारीलाई जनताप्रति थप जिम्मेवार बनाउने विश्वास व्यक्त गरे ।
