कपिलवस्तु । आगामी फागुन २१ गते सम्पन्न हुन गइरहेको प्रतिनिधि सभा सदस्य निर्वाचनको सुरक्षा व्यवस्थापनमा खटिने निर्वाचन प्रहरीहरूका लागि आयोजित अनुशिक्षण कार्यक्रमको कपिलवस्तुमा उद्घाटन गरिएको छ । माघ १८ गते आयोजित एक विशेष समारोहका बीच कपिलवस्तु जिल्लाका प्रमुख जिल्ला अधिकारी जनार्दन गौतमले पानसमा बत्ती बालेर उक्त तालिम कार्यक्रमको औपचारिक सुभारम्भ गर्नुभएको हो।
उक्त उद्घाटन समारोहमा जिल्ला प्रहरी कार्यालय कपिलवस्तुका कार्यालय प्रमुख सन्तोष आचार्य लगायत जिल्ला सुरक्षा समितिका पदाधिकारीहरू, तालिम प्रदान गर्ने प्रशिक्षक तथा निर्वाचन सुरक्षार्थ खटिने निर्वाचन प्रहरीहरूको उपस्थिति रहेको थियो। आगामी निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउन आवश्यक शान्ति सुरक्षा कायम गर्ने उद्देश्यले यो अनुशिक्षण कार्यक्रम सञ्चालन गरिएको हो।
