अर्घाखाँची । यहाँको सन्धिखर्क नगरपालिका–३ मा गर्भवती तथा सुत्केरीलाई पोषण सामग्री वितरण गरिएको छ । वडाभित्र रहेका सुनौलो हजार दिनका आमा तथा शिशुको पोषण सुधारलाई प्राथमिकता दिँदै सामग्री प्रदान गरिएको हो । बराहनेटा आधारभूत स्वास्थ्य केन्द्रको आयोजना तथा सन्धिखर्क नगरपालिका—३ कार्यालयको समन्वयमा सम्पन्न कार्यक्रममा २१ जना गर्भवती र ३१ जना सुत्केरी आमालाई पोषण सामग्री प्रदान गरिएको स्वास्थ्य केन्द्र प्रमुख धर्मराज पन्थीले बताउनुभयो ।
सुनौलो हजार दिन अवधिलाई लक्षित गर्दै आमालाई एक क्यारेट अण्डा, चना, साबुन र ‘नेल कटर’ वितरण गरिएको थियो । गर्भावस्था र सुत्केरी अवस्थामा सन्तुलित आहार, सरसफाइ र व्यक्तिगत स्वास्थ्य सुरक्षाले आमा र नवजात शिशुको स्वास्थ्यमा प्रत्यक्ष प्रभाव पार्ने भएकाले यस्ता सामग्री वितरण गरिएको वडाध्यक्ष जम्शेर मियाँले बताउनुभयो ।
