चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको वर्तमान राजनीतिक निकासका लागि निर्वाचन नै एकमात्र विकल्प भएको बताउनुभएको छ । कारागारबाट रिहा भएपछि चितवनको चौबिसकोठीमा कार्यकर्ताहरूलाई सम्बोधन गर्दै उहाँले 'जेनजी' (नयाँ पुस्ता) ले देखाएको सपना पूरा गर्न निर्वाचन अपरिहार्य रहेको उल्लेख गर्नुभयो ।
सम्बोधनका क्रममा सभापति लामिछानेले सरकारले सुशासन कायम गर्न र नयाँ पुस्ताको माग सम्बोधन गर्न दृढता देखाउनुपर्नेमा जोड दिनुभयो । उहाँले भन्नुभयो, “सरकारले युवाका सपना पूरा गर्ने हिम्मत गरोस् र निर्वाचन गराओस्, त्यसमा रास्वपाको पूर्ण साथ रहनेछ ।” उहाँले आफू प्रतिशोधको राजनीतिमा नलाग्ने र लोकतन्त्रको रक्षाका लागि सधैँ जिम्मेवार भएर उभिने प्रतिबद्धता समेत व्यक्त गर्नुभयो । देश जटिल मोडमा रहेकाले सबै पक्षलाई संयमित भएर अघि बढ्न उहाँले आग्रह गर्नुभयो ।
