भैरहवा । रुपन्देही, २०८२ भदौ २३: जिल्ला प्रशासन कार्यालय रुपन्देहीले आज (भदौ २३ गते) स्थानीय प्रशासन ऐन, २०२८ को दफा ६ क बमोजिम बुटवल र भैरहवाका विभिन्न क्षेत्रमा कर्फ्यू आदेश जारी गरेको छ। प्रमुख जिल्ला अधिकारी टोकराज पाण्डेद्वारा जारी गरिएको सूचना अनुसार, आज अपरान्ह ४:०० बजेदेखि राती १०:०० बजेसम्मका लागि यो आदेश लागू हुनेछ।
कर्फ्यू लागेको अवधिमा तोकिएका सीमानाभित्र कसैलाई पनि आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक, वा घेराउ गर्न पूर्ण रूपमा निषेध गरिएको छ।
कर्फ्यू प्रभावित क्षेत्रहरू:
बुटवल क्षेत्र:
पूर्व: पेट्रोल पम्प धागो कारखाना पुलसम्म
पश्चिम: बेलवास चोकसम्म
उत्तर: चिडिया खोलासम्म
दक्षिण: मंगलापुरसम्म
भैरहवा क्षेत्र:
पूर्व: रोहिणी खोला पुलसम्म
पश्चिम: बेथरी पुलसम्म
उत्तर: बुद्धचोकसम्म
दक्षिण: मेउडीहवासम्म
यसका साथै, बुटवल-बेलहिया सडक खण्डको दायाँबायाँ १०० मिटरसम्मको क्षेत्रमा पनि कर्फ्यू लागू हुनेछ। जिल्ला प्रशासन कार्यालय रुपन्देहीले सर्वसाधारणलाई कर्फ्यूको पालना गरी शान्ति सुरक्षा कायम गर्न सहयोग गर्न अनुरोध गरेको छ। आदेशको उल्लंघन गर्नेलाई कानुनबमोजिम कारबाही हुने चेतावनी पनि दिइएको छ।
