भैरहवा ।रुपन्देहीको सिद्धार्थनगर नगरपालिका (भैरहवा) ले बजारमा छाडा छाडिएका गाईगोरुको व्यवस्थापनसँगै जरिवाना कारवाही पनि थालेको छ ।
छाडा चौपायाले सवारी दुर्घटनाको जोखिमसँगै नगरको सौन्दर्यकरण समेत असर गरेपछि पालिकाले दोस्रो पटक अभियान चलाएर छाडा गाईगोरुको व्यवस्थापनसँगै गाईगोरु छाडा छाड्ने पशुधनीलाई जरिवाना कारवाही पनि थालेको हो ।
व्यवस्थापन अभियानको क्रममा दुई जना नगरवासीले पालेका चौपाया (गाईगोरु) छाडा छाडेको पाइएपछि ७ हजार रुपैयाँको दरले जरिवाना कारवाही गरिएको सिद्धार्थनगर नगरपालिकाका प्रमुख प्रशासकीय अधिकृत नवराज पौड्यालले जानकारी दिए ।
‘हामीले पटक पटक चौपाया छाडा नछाड्न आग्रह गर्दै आएका छौँ’ उनले भने, ‘तर अब आग्रह होइन अवस्था अनुसार जफत र जरिवाना कारवाही गर्छौ ।’
छाडा छाडिएका गाईगोरुलाई नियन्त्रणमा लिएर देवकोटा चोक स्थित होल्डिङ सेन्टरमा जम्मा गर्ने र त्यसपश्चात राष्ट्रिय गौं संरक्षण तथा अनुसन्धान केन्द्रमा व्यवस्थापन गर्ने गरिएको नगरपालिका कार्यालयले जनाएको छ ।
