भैरहवा । मदिरा व्यवसायी संघ भैरहवा, रुपन्देहीले तीज मिलन कार्यक्रम गरेको छ । संघले भैरहवामा उक्त कार्यक्रम गरेको हो । हिन्दू नारीहरुको महान पर्व हरितालिका तीजको अवसरमा कार्यक्रम गरिएको मदिरा व्यवसायी संघ भैरहवाका अध्यक्ष बाबुराम पाण्डेले बताए ।
उनले भने, ‘२०७७ सालमा यो संस्थाको स्थापना भएको हो । संस्थाले विभिन्न सामाजिक कार्य गर्दै आएको छ । तीज मिलन कार्यक्रम पहिलोपटक गरेका हौं ।’
कार्यक्रममा बोल्दै प्रमुख अतिथि जिल्ला प्रहरी कार्यालय रुपन्देहीको प्रहरी नायव उपरीक्षक (डीएसपी) लक्ष्मी खनालले नारीहरुको महान पर्व तीजको अवसरमा शुभकामना व्यक्त गरिन् । उनले पुरुष र महिला बराबर भएको बताइन् । डीएसपी खनालले भनिन्, ‘आफ्नो स्वास्थ्यको ख्याल गरौं । स्वास्थ्य नै मानिसको सबैभन्दा ठूलो धन हो ।’
त्यस्तै विशिष्ट अतिथि सिद्धार्थनगर नगरपालिकाको शिक्षा अधिकृत जानह्वी पाण्डेले तीज मिलन कार्यक्रम गरेर महिला दिदीबहिनीहरुसँग भेटघाट गर्ने अवसर प्रदान गरेको भन्दै मदिरा व्यवसायी संघ भैरहवालाई धन्यवाद दिइन् । उनले संस्कृतिको संरक्षणमा चाडपर्वहरुको भूमिका महत्वपूर्ण रहेकोमा जोड दिइन् ।
मदिरा व्यवसायी संघ भैरहवाका संस्थापक अध्यक्ष केशवराज ज्ञवालीले संघले व्यवसायीको हकहितमा काम गर्नुका साथै सामाजिक एवं रचनात्मक कार्य पनि गर्दै आएको बताए। कार्यक्रम संयोजक एवं संघका कोषाध्यक्ष विनोद आचार्यको स्वागत तथा प्रजिना आचार्यको सञ्चालनमा कार्यक्रम सम्पन्न भएको थियो । मदिरा व्यवसायी संघ भैरहवाले आगामी दिनमा पनि यस्ता कार्यक्रमलाई निरन्तरता दिदै जाने संघका वरिष्ठ उपाध्यक्ष भागिरथ पाण्डेले बताए ।
