भैरहवा । नेपाल पोलियोमुक्त भइसके पनि विश्वका केही देशमा यसको जोखिम कायमै रहेकाले खोप अभियान र जनचेतनालाई निरन्तरता दिनुपर्नेमा सरोकारवालाहरूले जोड दिएका छन्। विश्व पोलियो दिवसका अवसरमा रोटरीको ‘इन्ड पोलियो नाउ’ अभियानअन्तर्गत भैरहवामा आयोजित जनचेतनामूलक र्यालीका सहभागीहरूले पोलियो उन्मूलनका लागि सामूहिक सहकार्य आवश्यक रहेको बताएका हुन्।
कार्यक्रममा प्रतिनिधिसभा सदस्य डा. लेखजंग थापाले पोलियोको पूर्ण उपचार नभएकाले खोपमार्फत रोकथाम गर्नु नै प्रभावकारी उपाय भएको बताउनुभयो। अर्का प्रतिनिधिसभा सदस्य ज्ञानु पौड्यालले बालबालिकालाई सुरक्षित राख्न खोपको पहुँच विस्तार र समुदायस्तरको चेतना आवश्यक रहेको उल्लेख गर्दै रोटरीको योगदानको प्रशंसा गर्नुभयो। र्यालीमा विभिन्न रोटरी क्लबका पदाधिकारी तथा प्रतिनिधिहरूको सहभागिता रहेको थियो।
