सोनौली । नेपाल-भारत सीमा क्षेत्रमा तस्करी नियन्त्रण अभियानका क्रममा सशस्त्र सीमा बल र भारतीय प्रहरीको संयुक्त टोलीले ठूलो परिमाणमा अवैध विदेशी ओखर बरामद गरेको छ। सीमा स्तम्भ संख्या ५१७/२ नजिकै गरिएको नियमित जाँचका क्रममा नेपालबाट भारततर्फ जाँदै गरेको आरजे १४ जीजे ५७२२ नम्बरको भारतीय ट्रकबाट उक्त ओखर बरामद गरिएको हो।
तस्करीका लागि ट्रकभित्र विशेष रूपमा बनाइएको ‘केबिन’ भित्र लुकाएर राखिएको अवस्थामा १०३ वटा बोरामा प्याक गरिएको कुल २५ सय ७० किलो ओखर फेला परेको सुरक्षा निकायले जनाएको छ। प्रारम्भिक अनुसन्धानका क्रममा यो ओखर काठमाडौंबाट लोड गरी भारतको राजधानी दिल्ली पुर्याउने योजना रहेको खुलेको छ।
बरामद ओखर र ट्रकसहित चालकलाई नियन्त्रणमा लिएर थप कानुनी कारबाही अगाडि बढाइएको छ। नेपालका दर्जनौं चेकपोष्ट र सुरक्षा घेरा पार गर्दै काठमाडौंबाट हिँडेको तस्करीको सामान सीमासम्म कसरी पुग्यो भन्ने विषयले अहिले सीमा क्षेत्रमा सुरक्षाबारे गम्भीर प्रश्न उब्जाएको छ। यस घटनामा अन्य गिरोहको संलग्नताबारे भारतीय सुरक्षा स्रोतले थप अनुसन्धान गरिरहेको छ।
