काठमाडौँ । नागरिक र प्रहरीबीचको सम्बन्धलाई थप बलियो बनाउन ‘हाम्रो प्रहरी’ कार्यक्रम सुरु गरिएको छ । जिल्ला प्रहरी परिसर काठमाडौँले समुदाय र नागरिकबीचको सम्बन्ध र सहकार्यलाई बलियो बनाउन आजदेखि उक्त कार्यक्रम सुरु गरेको हो । परिसरका प्रमुख, प्रहरी वरिष्ठ उपरीक्षक (एसएसपी) रमेश थापाले नागरिक र प्रहरीबीचको सम्बन्धलाई मजबुत बनाई अपराध नियन्त्रण तथा अनुसन्धान, नागरिकको सुरक्षा, विपद् उद्दार, सामाजिक सद्भाव र अमन चयनका लागि सामूहिक ऐक्यबद्धता कायम गर्न उक्त कार्यक्रम सुरु गरिएको जानकारी दिनुभयो ।
उक्त कार्यक्रम प्रहरी र नागरिकबीचको सम्बन्धलाई थप बलियो बनाउन मद्दत पुग्ने परिसर प्रमुख थापाले बताउनुभयो । गत भदौ २३ र २४ गते भएको जेनजी आन्दोलनका क्रममा भत्किएका प्रहरी कार्यालयहरू नागरिकको सहकार्यमा पुनर्निर्माण भएसँगै हाम्रो प्रहरी भन्ने भावना नागरिकमा विकास हुँदै गएको छ । काठमाडौँ प्रहरीले आफू मातहतका हरेक कार्यालयमार्फत टोल, समाज र विद्यालयमा पुगेर हाम्रो प्रहरी कार्यक्रम सञ्चालन गर्नेछ ।
