दैलेख । कर्णाली प्रदेश प्रहरी कार्यालयद्वारा सञ्चालित प्रवर्धनमूलक अभियान “एक चौकी एक रात” कार्यक्रम अन्तर्गत कर्णाली प्रदेश प्रहरी प्रमुख प्रहरी नायव महानिरीक्षक (डीआईजी) जयराज सापकोटाले दैलेखका विभिन्न प्रहरी चौकीहरूको अनुगमन तथा निरीक्षण गर्नुभएको छ।
अभियानकै क्रममा दैलेख पुग्नुभएका डीआईजी सापकोटाले जिल्ला प्रहरी कार्यालय दैलेख मातहतमा रहेको प्रहरी चौकी रानीमत्तामा रात बिताउनुभएको थियो। त्यसको भोलिपल्ट उहाँले प्रहरी चौकी रानीमत्ता र प्रहरी चौकी माथिल्लो डुङ्गेश्वरको अनुगमन तथा निरीक्षण गर्नुभयो।
निरीक्षणका क्रममा प्रदेश प्रहरी प्रमुख सापकोटाले कार्यक्षेत्रमा खटिएका प्रहरी कर्मचारीहरूलाई नागरिकमैत्री सेवा प्रवाह गर्न, शान्ति सुरक्षा चुस्त राख्न र संगठनको गरिमा उच्च बनाउन आवश्यक निर्देशन दिनुभयो। सोही अवसरमा उहाँले स्थानीयबासी एवं नागरिक समाजका प्रतिनिधिहरूसँग समेत भेटघाट गरी समसामयिक सुरक्षा अवस्था र प्रहरी-नागरिक समन्वयका विषयमा बृहत छलफल गर्नुभएको थियो।
